題目:生命中的貴人
自出社會到結婚生囡仔，家己成立一个家庭，除了爸母對我的溫情較大天，比海閣較深以外，閣有一个人是我真正感恩的人，彼的人就是我的翁婿。
我的翁婿加我四歲，阮倆人會識似是我的 屘叔仔紹介的。彼的時陣，我蹛佇下港，伊蹛佇北部食頭路，因為定定去南投竹山屘叔𪜶姪仔遐𨑨迌，叔仔看伊真定著，就問伊：敢有對象矣。伊講：曷無對象。自按呢，阮倆人ê姻緣就相牽起來矣。經過三年外的長距離交往，才無簡單來結成連理，了後，我就綴翁婿來到台北，佮伊做伙拍拚。
毋過，雖罔北部生活真便利，蹛佇下港慣勢的我，真袂適應北部的空氣佮交通，因為狹閣𤲍，車輛來來去去速度攏誠緊，逐工空氣嘛真䆀，予我強強欲袂喘氣！
伊知了後，歇睏日攏會𤆬我去山頂行行咧、看看咧，放鬆心情，予我壓力莫遐爾大，嘛予我熟似蹛的所在附近的地理位置，按呢，我若普通時仔欲出去行行咧，嘛知影路通去。閣有，厝內的工課，伊嘛攏會共我鬥相楗，抾起來做，嘛會共我鬥𤆬囡仔，小可仔的鬥相共對我著足有幫贊--ê，抑無我𤆬一个囡仔二十四點鐘實在袂堪得。
見擺我若拄著困難，我的翁婿知影，伊就會鼓勵我，做我心靈導師，開破我內心的困境，予我真緊就會當跳脫所拄著的困難，抑毋無我真正痛苦無解，行袂出心魔！
所以，我真正感謝我的翁婿，伊對我ê好，點點滴滴我攏囥佇心肝內，溫暖著我、鼓勵著我！伊真正是我一世人的貴人佮好phuānn-lí!
**刊tī2022/6月(台文罔報NO.339)
Comments