做一个台語老師ê思考

我感覺不管做tó 一種老師，咱ê言行，學生lóng看tī眼內。尤其，我進前是tī國校teh教台語ê老師。一般來講，我袂佮意用罵ê方式來教囡仔，因為你nā是定定kā罵，伊就袂佮意你這个老師，甚至袂想欲上你ê台語課。

我bat聽過一个台中教育大學ê台文系教授講過，你beh愛學生愛上你ê台語課，就愛先佮意你這个先生，學生才願意好好仔上你ê課，抑無伊只是kā你應付ê爾，m̄-sī 真心kah你交陪。

我會記得 koh tī 國校上1年--á､2年--á ê 課ê時陣，我上課進前，in lóng真歡喜講:「Yeah！Koh 欲上台語課--ah!」足歡喜 ê 款，我看tī 眼內，mā 真感心。我知影我 ê 行為會影響tio̍h囡仔，所擺我teh教in ê 時，lóng 足注意我所講ê話。Tī 上課ê 過程中，我lóng 會鼓勵in加講台語，學生上了感覺好，就會誠注心teh 聽，我向望我予in ê m̄-nā是台語ê智識，是做人ê智慧kap對待人ê行為愛有禮貌。